Oldtimer Motocross Club Schweiz OMC   |   Impressum   |   Hinweis zu den Links   |   Satzung

Berichte

MXRS Dierikon vom 17.10.2020 uf Bärndütsch

Samschtig Morge, o je het no grägnet letscht Nacht, viellächt isches im Luzärnische besser. Ungerwägs bi Sursee vou im Räge füüf Minute lang, o je. Usfahrt Richtig Dierikon am Hang obe, Pischte gseht super us vo wietem, fasch wie Escholzmatt. Die brune Pünkt (dräckigi Fahrer) gfauemer nid es so, chöme fasch nid vorwärts ömu opsig. Richtig Fahrerlager, gsehts füecht us, Söu i mir das atue oder söu i doch besser umchere, Bi ke Feigling mues ga luege. Wo inefahre i dä Plüter, schissdräck i stecke fescht, nid hingerzi nid fürezi, auso la stah u am Abe luegä; ä Traktor hets sicher. Gott sei Dank hani d`Gummistifflä mit gno, es het scho angeri OMCler da, aber aui mache chli längwiligi Gringä. D`Strecki isch nass u gschlifferig, ig u äs Zyttränig fahre, das tueni mir sicher nid a. Es hett tatsächlich es paar herti Twin Shock Fahrer wos probiere. Wenn d`Sunne chli füre chäm wärs sicher am viertel vor drü chli abtrochnet u scho fahrbar mit üsne aute Chläpf. Isch ächt no öppis übrigbliebe vo mine Endurojahr, heimer ja o bi jedem Wätter dörfä fahre. Nam Mittag gsehts scho besser us, hett scho chli abtrochnet. Auso Töff uslade u zwägmache, schisst mi jtz scho a di ganze Sache nächscht Wuche z`putze. Bim erschte Lauf am Startbauke si doch öppä zwänzg Fahrer. Füfzä, füüf Sekunde u de isch dr Bauke dunger u jede wott wider z`forderscht si. Mi Plan gäng fahre u nid umgheiä isch gar nid so schlächt gange, Ha nid ganz aues verlehrt. Bi z`friedä mit mir, u we dr Ranze no chli chliner wär wärs sicher no besser gange. Tüpisch Chrigu het me dr Zytplan nid chönne i haute u am zwänzg ab sächsi no Starte zum zwöite Louf wär bi derä Dämmerig chli gfährlich gsi. Schad... Outo usem Pfludi schiebe u hei ga putze. Bis bald in Agasul. Gruess René