Hessencup Aufenau DE vom 13.6.2021
Rolf üse Teamchef het die nid eifachi Amäudig füre Wädi, Jack, Ruedi, Wauterli, Beat, Michu u Roli suverän erledigt. Coronatescht, Säubschtuskunft u gfüerti Platzierig is Fahrerlager ab de siebne, Tageslizänz u Trasponder abhole im Rennbüro u diversi Bierli isch üsi Areis nach Aufenau zändgange. Freis Träning am Sunntig Morge, o je, sone Schissi, so vieu Bewässere wär nid nötig gsi letscht Nacht. I has mit zueluege erledigt, ig tue nid gärn zwe Rundine umerütsche u nähr ä Stung putze. Vier vo üs heis probiert u die angere vier hei zuegluegt. Zytträning, bis ig weis wos düregeit u die Sprüng chli kenne isch di vertustung scho fasch düre. Erschte Louf vou motiviert, wo isch di 15s u 5s Tafele? U scho isch dr Bauke dunger, de fahre i haut o los, erschti Kurve dr Wauterli zhingerscht, so hani mir das de nid vorgsteut, aber itz geits haut vou motiviert vo hinger los. Scho siebe Gägner Gfrässe bis zur zähte Kurve, da ligt eine am Bode, dr Fahrer links vo mir wicht us quer übere vou i mi ine, rächts Bei ungerem Töff, Motor abgwürgt u scho bini wieder zhingerscht. Vier meter schiebe u dr Hang abe la atrole, judihui d BSA louft. Mit dr Wuet im Ranze geits zimli vorwärts, schad het mes Renne uf 13 Minute u 1 Rundi verkürzt, hät no chli möge. Dr zwöit Louf cha nume besser wärde, vou konzentriert 15s erschte Gang ine, 5s ig bi parat, Bauke abe, ig sta aus einzige no da, isch ke Gang dinne ha zweni abetrükt, das passiert o nume mir. Gott sei dank isch dr Hans nid da. Ig bimers hüt gwönt aui vo hinger ds gseh. Cha i de erschte 10 Minute scho äs paar Fahrer überhole, bi aber nüme so locker gfahre wie im erschte Lauf. Mini Gedanke i de letschte Rundine, wenn chunnt ändlich die blödi Fahne, ig ma nümme. Super Renne, super Verastautig, super Wädi, Gratuliere no einisch, mir chöme sicher no einisch uf Aufenau.
( Hoffentlich oni Coronauflage )
Gruess René