Blackburry Scramble 24.10.2021
Samschtig Abe, ig frühre scho im Feschtzäut ad Scheiche, wi söu das am Sunntig Morge am achti im freie Träning wärde, mir gruset scho itz. Am Morge, ig luege use, aues gfrohre dusse u wiss vom Rif, das isch nüt für mi ( Weichei seit mä däm ). Am nüni isch Zytträning, itz mues ig mi i Arsch chlemme, cha doch nid dr weich usehänke. Geit ganz guet, bi zfriede mit miere Zyt. Bim abstiege im Fahrerlager hani ke Gfüeu me i mine Pfötli, äs negelet i de Fingerspitze. Kes Wüechli am Himu, perfekts Wätter, super BSA Strecki, top Organisation, was wot mä meh. Sogar dr Erich us Öestrich isch uf Blackburry, oder für die wo nid Bärndütsch chöi, Schwarzeburg agreist. Haubi zwöi, Troum Bedingige bim erschte Louf u rächt warm, u so wie gäng öppe di schnäue vorab u di angere hingernache. Nach zwänzg Minute, müed aber zfriede isch dr erscht Louf verbi. Am vieri isch dr zwöit Louf, veiechli vieu Zueschouer a dr Strecki, äs isch schön das mir Aute chöi zeige das mer no nid zum aute Ise ghöre. Grosse Dank am Verastauter, de viele Häufer u aune Fahrer für di fere Zwöikämpf, so macht Crössle Spass. Ig fröie mi ufs 2022 u hoffe mir gseh o wieder me jüngeri Fahrer.
Gruess René